अफवा पसरवणाऱ्यांविरुद्ध कडक कारवाई करणार: सहाय्यक पोलीस निरीक्षक अजय गोरड
प्रगल्भनायक न्यूज नेटवर्क
उंब्रज
चरेगाव ता.कराड तसेच परिसरातील वाड्या-वस्त्यांवरील अफवा पसरवणाऱ्या नागरिकांवर कडक कारवाई केली जाणार असून कोणत्याही प्रकारच्या तथ्यहीन अफवांवरती विश्वास ठेवू नये, असे आवाहन उंब्रज पोलीस स्टेशनचे सहाय्यक पोलीस निरीक्षक अजय गोरड यांनी केले आहे.
दरम्यान, मागील काही दिवसांपासून लहान मुले पळवणारी टोळी सक्रिय झाल्याबाबत फेसबुक,व्हाट्सअप, ऑडिओ/व्हिडिओ क्लिप, फोटो व्हायरल होत आहेत. त्यामुळे जनमानसात व विशेषतः पालकांमध्ये भीतीचे व चिंतेचे वातावरण पसरत आहे. तसेच मागील दोन दिवसांपासून सोशल मीडियावर काही विद्यार्थ्यांचे फोटो व्हायरल केले जात असून त्यांना शाळेतून पळवून अपहरण करून नेले आहे. अशा अफवा पसरवल्या जात आहेत.
परंतु, यात कोणत्याही प्रकारचे तथ्य नसून अशा प्रकारची कोणतीही घटना उंब्रज पोलीस स्टेशनच्या हद्दीत घडलेली नाही. तरी पालकांनी अशा प्रकारच्या अफवांवरती विश्वास ठेवू नये. असा प्रकार आपल्या निदर्शनास आल्यास तात्काळ पोलीस नियंत्रण कक्ष सातारा येथे डायल ११२/१००/ उंब्रज पोलीस स्टेशन येथे फोन नंबर ०२१६४-२६४०३३ किंवा ९६२३९६१००० या मोबाईल क्रमांकावर संपर्क साधून घटनेबाबत शहानिशा करून घ्यावी.
तसेच अशा प्रकारची माहिती अथवा संदेश मिळाल्यास नागरिकांनी पूर्ण खात्री केल्याशिवाय ते प्रसारित करू नयेत. अशा प्रकारच्या खोट्या माहितीद्वारे अफवा पसरवणाऱ्या नागरिकांविरुद्ध योग्य ती कायदेशीर कारवाई करण्यात येईल असा इशारा उंब्रज पोलीस स्टेशनचे सहाय्यक पोलीस निरीक्षक अजय गोरड यांनी दिला आहे.
