प्रगल्भनायक न्यूज नेटवर्क
आटपाडी
आटपाडी तालुक्यातील चिंचाळे येथील बाळूताई महादेव गायकवाड (वय ५०) या महिलेचे दोन अज्ञात इसमांनी आवटेवाडी-नेलकरंजी गावांच्या दरम्यान भरदिवसा रस्त्यावरच नऊ तोळे सोन्याचे दागिने लुटले.समोर अपघात झाल्याचे खोटे बोलून महिलेस दागिने पिशवीत ठेवण्यास सांगितले व पिशवीत गांजा आहे म्हणत पिशवीत हात घालून सोने घेऊन चोरटे मोटरसायकलवरून पसार झाले.
याबाबत पोलिसांकडून मिळालेली माहिती अशी की, रविवारी दुपारी ११ वाजण्याच्या सुमारास बाळूताई गायकवाड आवटेवाडी-नेलकरंजी या दोन गावाच्या दरम्यान रस्त्यावर असताना दोन अज्ञात इसम तेथे आलेे. त्यांनी या महिलेस समोर अपघात झाला आहे,असे खोटे बोलून तिचे दागिने पिशवीत ठेवण्यास सांगितले. त्यानंतर तुमच्या पिशवीत गांजा आहे,असे म्हणून पिशवीत हात घालून सोन्याचे दागिने घेऊन चोरटे मोटरसायकलवरून निघून गेले. यामध्ये सात वर्षांपूर्वी खरेदी केलेले दोन लाख, दहा हजार रुपये किंमतीचे सात तोळे वजनाचे एक सोन्याचे मंगळसूत्र आणि दोन वर्षांपूर्वी खरेदी केलेली ७० हजार रुपये किंमतीची दोन तोळे वजनाची गळ्यातील सोन्याची चैन असा एकूण दोन लाख, ८० हजार रुपये किंमतीचा सोन्याचा ऐवज लुटून नेला आहे. याबाबतची फिर्याद खरसुंडी दूरक्षेत्र येथे देण्यात आली आहे. पुढील तपास पोलीस उपनिरीक्षक गोसावी करीत आहेत.
